Акафист священномученнику Климентию (графу Казимиру Шептицкому)

 

Кондак 1

 

Избранный Богом от юности к служению Вселенской Церкви, предивный угодниче Божий, Священомучениче Климентие, пламенем любви Христовой разжигаемый, на камене веры процвел еси; биения и поношения, и темничные изнурения от богоборцев кротко претерпел еси, со всеми страстотерпцы народа нашего, пастырю добрый, душу твою за паству положил еси. Ныне всечестную твою память празднуще, похвальное пение приносим ти. Ты же, яко имеяй дерзновение ко Владыце небесе и земли, от всяких нас бед свободи, к тебе ныне зовущих:

Радуйся, богоносный священномучениче Климентие, скорый помощниче и молитвениче о душах наших.

 

Икос 1

 

Ангел земный и человек небесный был еси, святый отче Климентие, вперив бо ум в божественная, временная и земная пренебрегл еси, от юности бо до самой кончины мученической неустанно Господеви работал еси, труды ко трудом прилагая и от силы в силу восходя, да прославится в тебе Христос, Его же ради подвизался еси, Его же возлюбил еси, Его же Единого вожделе душа твоя, Его же ради страдания многи претерпел еси, Его же благодатию светло украшен еси. Сего ради тебе, на небеси и на земли прославленному вопием сице:

Радуйся, родителей именитых чадо благословенное.

Радуйся, на древе рода своего плодоносящею ветвию возцветший.

Радуйся, святость рода своего славнаго многократно приумноживый.

Радуйся, добродетелем преславных предков твоих подражавый,

Радуйся, за проповедание веры и жизни своей не пощадивший;

Радуйся, от юности твоея Богу служити вожделевый.

Радуйся, благую часть от утра жития твоего избравый.

Радуйся, мир и вся его прелести оставивый.

Радуйся, Господа всем сердцем возлюбивый.

Радуйся, святую душу твою за имя Святое Христово положивший.

Радуйся, Церкве Вселенской благоукрашeнный венче.

Радуйся, Христов предивный исповедниче и страстотeрпче.

Радуйся, богоносный священномучениче Климентие, скорый  помощниче и молитвениче о душах наших!  

Кондак 2

 

Видевше тебя своего сына, благочестивая матерь твоя,  благоверная графиня София, преуспевающего в возрасте и премудрости Божией и добродетелями евангельскими украшенного, возрадовалась о тебе, благодарно поя о тебе премудрости наставнику и разума подателю Богу: «Аллилуйя!»

Икос 2

Разум, озаренный Духом Святым, стяжал еси, угодниче Божий, от юности твоея, бо хранил еси в сердце твоем закон Христов, великим угодником Божиим, прошедшим тернистым путем во Царствие Небесное, в подвигах благочестия и делах милосердия подражая, (в премудрости человеческой и богословии  возрастая,) ко Христу (источнику и смыслу жизни человеческой) всецелое доверие стяжавше. Темже и мы, уповая на твое предстательство, молимся: буди нам скорым помощником и покровителем в земном житии нашем, да благодарно вопием ти:

Радуйся, светом твоим нашу тьму греховную разгоняющий.

Радуйся, теплотою любви твоея наша хладная сердца согревающий.

Радуйся, козни вражия предстательством твоим разрушающий.

Радуйся, сладостию молитв твоих скорби наша растворяющий.

Радуйся, милостивое предстательство твое верным являющий.

Радуйся, сокровище мира духовнаго нам открывающий.

Радуйся, к свету Христову заблудшия наставляющий.

Радуйся, упованию христианскому верныя научающий.

Радуйся, богоносный священномучениче Климентие, скорый помощниче и молитвениче о душах наших! 

Кондак 3

 

Силою Бога Всевышняго, всельшеюся в тя, преподобне Климентие, возлюбил еси ближних и явился еси алчущим питатель, нищим и сирым защитник, недугующим помощник, поя Подателю всех благ Богу: Аллилуия. 

 

Икос 3

 

Имуще ум и сердце открытые к благодати Божией, непрестaнно глaс Божий в сердце твоeм слышал еси, ко исповеданию истины и пасeнию овeц Христовых тебя призывaющий, благий и верный слуга Господень и преданный соратник и сподвижник богомудраго брата твоего, благословеннаго святителя Андрея, воистину явился еси: до конца пaстырское служeние исполнял еси, достоблажeнне отче. Тем покланяющеся величию души твоея, во умилeнии глаголем ти:

Радуйся, на путь узкий, ведущий в жизнь вечную, вступивый.

Радуйся, обетом девства чистоту сердца твоего явивый!

Радуйся, обетом нестяжания высоту духа твоего показавый!

Радуйся, обетом послушания Богу и ближним добре послуживший!

Радуйся, во имя  священномученика Климентия Римскаго  во иночестве наречeнный.

Радуйся, подвигом и страданиям онаго о Господе поревновaвый.

Радуйся, слaдость словeс Господних в сердце всегда хранивый.

Радуйся, игу благому Христову самого себе всецело подклонивый.

Радуйся, богоносный священномучениче Климентие, скорый помощниче и молитвениче о душах наших!

 

Кондак 4

 

Бурю внутрь помыслов и страстей волны безбедно прешед, преподобне отче, обрел еси тихое пристанище Христа, Емуже неленостно во мнозе долготерпении поработал еси; отнюдуже божественною благодатию Христовою восходя от силы в силу от деяния к боговидению, верен Спасителю и наместнику Его, не взирая на нашествиие богоборцев, пребыл еси до конца, и тако небеснаго Иерусалима достигл еси, идеже со ангелы и всеми святыми Церкви Вселенския поеши Троице Святей песнь: Аллилуиа.

 

Икос 4

 

Слышавше, богоблажене авво Климентие, сладчайший глас Христов: «Иже хощет по Мне идти, да отвержется себе. И возмет крест свой и по Мне грядет», оставиша мир и вся яже в нем под сень Животворящего Креста притекл еси и всем чадом твоим духовным благовестил еси спасение чрез крестныя страдания Господа нашего и Спасителя и сами блаженства райския улучивше, умилением и отрадою духовною напаяеши сердца наша, вопиющия тебе таковая:

Радуйся, заповеди Божии в сердце  выну  носивый.

Радуйся, мысль свою в Бозе (смиренномудренно) утвердивый.

Радуйся, на высоту безстрастия (и богомыслия) возшедый.

Радуйся, в служении Богу дарованные ти таланты зело умноживый.

Радуйся, cан  священства, аки дар Божий, радостно приявый.

Радуйся, равноангельнаго жития образ истинный нам явивый.

Радуйся, преподобному Бернарду в вере и твердом уповании на Господа подражавый.

Радуйся, подобно святым Франциску и Серафиму радость духовную стяжавый!

Радуйся, богоносный священномучениче Климентие, скорый помощниче и молитвениче о душах наших!

 

Кондaк 5

 

Богоизбрaнный воине Христов, оружием веры и огненным мечeм словeс божеcтвенных посекaл еси всякое нечeстие, разрушaл еси козни врaжия, защищaя достояние церковное;  всяк  же притекающий к тебе, богоносне отче наш Климентие, словом любве и наставлением в вере бысть тобою встречаемь, ты бо просвещал еси светом апостольских истин всех к тебе приходивших во дни земнаго жития твоего; наставляя на путь царственный добродетелей богоугодных и поучая ни одесную, ни ошую от него не уклонятися; сего ради просим тя, преподобне отче, утверди и наша сердца по Бозе горети, да воспоем купно с тобою Спасителю Нашему ангельское пение: Аллилуйя!

 

 

Икос 5

 

Видевше желающии жития иноческаго, яко во общежитие монашеское  (и благочиние монастырское) (и духовные традиции) хранимы суть тобою, преподобне отче наш Климентие, людие стекахуся во множестве к тебе, слышавше боговдохновенныя поучения твоя, к покаянию и исправлению жительства своего устремившеся, от грехов и страстей отвращающеся, в разум истинный прихождаху, и твоею учительною беседою назидающеся, образом же жития твоего умиляющеся; мы же, прославляюще о тебе Господа Бога, вопием ти:

Радуйся, иноческих обетов пламенный исполнителю.

Радуйся, древним подвижником усердный подражателю;

Радуйся, отцев Добротолюбия достойный сонаследниче;

Радуйся, учений  западных святых  пречудный  восприемниче;

Радуйся, овцы Христовы на живоносных пажитех воспитавый.

Радуйся, деннонощными подвиги плоть твою духу покоривый;

Радуйся, к богомыслию твоему деяния приложивый;

Радуйся, терпению иноческаго жития всех научивый.

Радуйся, богоносный священномучениче Климентие, скорый помощниче и молитвениче о душах наших! 

Кондак 6

 

Проповедник словом и делом жития монашескаго был еси, отче наш Климентие, сего ради богомудрый Святитель Андрей, благослови тя по правилам восточных Отцов возродити благочиние студитское во отчизне твоей, и во веки соблюдати оное в ней заповеда, яко да славится тобою святая обитель пресветло в землех украинских, иноцы же и мирстии людие в ней молящеся духовне возрастают и от силы в силу преходяще, воспевают Христу Богу: Аллилуиа. 

Икос 6

 

Возсиял еси, яко светило многосветлое, во Уневстей лавре, егда начальство во оной восприял еси, священномучениче  Климентие, не устрашился бо еси великаго бремене правления, но во всем образ добрыя жизни подавая, наставял еси братию подвигом иноческим. Сего ради восписуем ти похвалу сицевую:

Радуйся, иноков добрых кроткий и искусный водителю;

Радуйся, братиям твоим духовным смиренный учителю.

Радуйся, стадо Христово иноков от волков хищных ограждавый; Радуйся, скорби и радости их в сердце вмещавый.

Радуйся, о вечном спасении братии ко Господу взывавый;

Радуйся, к житию по законам евангельским выну их понуждавый.

Радуйся, пастырю добрый, тяготы ближних своих смиренно носивый;

Радуйся, уставы отеческия во обители твоей сохранивый.

Радуйся, богоносный священномучениче Климентие, скорый помощниче и молитвениче о душах наших.

 

Кондак 7

 

Хотя последовати Христу, подражал Ему всеусердно, прияв на себя иго Его, научился от Него кротости и смирению, возжелал еси всем сердцем твоим, блаженне Климентие, единому Господу работати, себе ни во чтоже вменил еси, труды к трудом в дусе кротости и смирения прилагая, постом и бдением плоть свою умерщвляя, дерзновение в молитве стяжал еси, всех призывая верно славити Бога, в Троице Единаго, и воспевати Ему: Аллилуиа. 

Икос 7

 

Новаго светильника дарова Господь Церкви Греко-Католической – Климентия, священномученика всеславнаго, ты бо, угодниче Божий, ныне в вышних пребываеши, но и нас, низших, не оставляеши твоими молитвами и предстательством у Христа – Царя славы и Господа Бога нашего. Сего ради, недоумеюще благохвалити тя по достоянию, со умилением сердца, из глубины души, к тебе  взываем:

Радуйся, за Христа на земли страдавший и со Христом на небеси царствующий;

Радуйся, с высоты небесныя милостивно на нас, призирающий.

Радуйся, похвалы наша благосердно и милостиво приемлющий;

Радуйся, молитвам нашим, аще и немощным, с любовию внемлющий.

Радуйся, от всея души и сердца возносимая к вам прошения наша

исполняющий;

Радуйся, вере правой и  благочестию нас научающий;

Радуйся, надежду известную нам подавающий.

Радуйся, любовь нелицемерную в нас воспламеняющий;

Радуйся, богоносный священномучениче Климентие, скорый помощниче и молитвениче о душах наших!

Кондак 8

 

Странному и неизреченному смирению воплотившегося Бога Слова подражая, блаженне Климентие, сам исполнился еси великаго смирения   и незлобия, даже ко врагом и недоброжелателем народа и церкви твоих. Мы же ныне молим тя, угодниче Божий, представительством твоим небесным испроси и нам сия боголюбезныя добродетели, да не поработимся страстем греховным, но исполнимся духа любви и кротости к ближним нашим и благочестно воспоем Спасителю Нашему: «Аллилуйа!»

 

Икос 8

 

Всею душею возлюбил еси, всехвальный Климентие, благословенную отчизну твою и народ украинский во дни испытания военного притесняемых и беззащитных спаситель, обремененных и страждущих помощник и заступник, отчаявшихся и скорбящих утешитель благодатный явился еси, не щадил бо еси естества твоего и силу велию духовную явил еси, служа всем со смирением и любовию. Тем же просим тя: и к нас, грешных, твоею молитвою исцели и буди нам ко спасению управителем, да благодарственно воспоем ти:

Радуйся, вражды и ссоры наша умиротворяющий;

Радуйся, всякий мрак заблуждения от нас прогоняющий.

Радуйся, во всех нуждах, бедах и обстояниих нам помогающий.

Радуйся, безвестная и тайная премудрости Божия нам открывающий;

Радуйся, благия мысли и чувства в недоумении нам сущим внушающий.

Радуйся, внутренний мрак душ наших светом Христовым озаряющий.

Радуйся, в пренесении испытаний и гонений нас укрепляющий.

Радуйся, святыя желания ко спасению нашему в сердца наши влагающий;

Радуйся, великое Милосердие Божие к нам, грешным преклоняющий;

Радуйся, богоносный священномучениче Климентие, скорый помощниче и молитвениче о душах наших!

Кондак 9

 

Всякие труды подъял еси, святче Божий Климентие, всякие лишения, скорбь об убиении сродников, обиды и болезни твоих претерпел еси, спасения ради  духовных чад твоих, егда властителие советские открыша гонение на святую церковь греко-католическую и  враги народа Божия устремились на тя, ищуще души твоея. Ты же  глаголал еси: мне еже жити Христос, и смерть приобретение. Сего ради вся находящия ти скорби кротце терпел еси, рассуждая, яко недостойны суть страсти века сего хотящей явитися в нас славе Христовой, воспевая Богу: Аллилуиа.  

Икос 9

 

Ветии суемудреннии не могут разумети высоты добродетелей твоих, ниже глубины божеcтвенныя твоея любве: тоя рaди многая страдания благодушно претерпел еси, еже от Господа ти неразлучeну быти. Мы же, чтущии святость души твоея и силу духовною, Богом ти даровaнную, во умилeнии глаголем:

Радуйся, верность апостольскому престолу свято хранивый

Радуйся, не идти на уступки (коммунистам) паству твою учивый

Радуйся, до конца с людьми Божиими  пребывый

Радуйся, в годину испытаний многих в вере Христовой утвердивый

Радуйся, образ страдaния и любве ко Господу нaм являяй;

Радуйся, на узкий путь спасeния нaс наставляяй.

Радуйся, о единении всех христиан Иисуса  ныне умоляющий!

Радуйся, о просветлении духовном пред Девой Марией предстательствующий!

Радуйся, славянские народы в мире жить научающий!

Радуйся, богоносный священномучениче Климентие, скорый помощниче и молитвениче о душах наших!

Кондак 10 

Спасти восхотев словесное стадо твое от лютаго свирепства властителей богоборных, угодниче  Христов Климентие, яко истинный пастырь положити душу за овцы своя присно готовый, ярость и вероломство их всенародно в кротость преложити тщался еси, гнев же его неукротимый к тебе и к пастве твоей видев, к подвигу мученическому преуготовлял еси себе, умиленным сердцем и чистыми усты Всепобеждающему и Всесправедливому Господу, воспевая победную песнь: Аллилуиа.

 

Икос 10

Стену необориму имел еси благодать Господню, благий отче, защищaюшу тя от враг невидимых, не могущих души твоея погубити: достоин бо тоя благодати явился еси богоугодными труды твоими и умилeнными молитвами, иже преусердно возносил еси в темнице Киевской, муки душевныя и иныя страдания  от  звероподобных и бесоводимых богоборцев смиренне претерпевая. Сего рaди покланяющеся Всемилоcтивому Богу, воспевaем тя, единаго от избрaнных Его, хвалении таковыми:

Радуйся, стратотерпче, Христа безстрaшно исповедавый;

Радуйся, боязни и стрaха человеческаго не ведавый.

Радуйся, пaстырю, душу за овцы твоя полагaвый;

Радуйся, наeмником лукавым пaствы твоея расхитити не дaвый.

Радуйся, правды Божия и верности народу твоему ради изгнанный;

Радуйся, в темничное подземелье, яко в гроб, вверженный;

Радуйся, посещением святаго Иосафата утешеннный и укрепленный;

Радуйся, от Господа вечною славою не небесех венчанный;

Радуйся, богоносный священномучениче Климентие, скорый помощниче и молитвениче о душах наших! 

Кондак 11 

Пение хвалебное приносим ти от смиренных сердец наших мученическия ради кончины твоея, дивный наш исповедниче Климентие  весть бо о смерти твоей в мрачной темнице коммунистической дошла до земель галицийских и столицы апостольской. Тогда вси со многими слезами страдальческую кончину твою прославляху, премудрому Господу сладчайшую ангельскую песнь воспевающе: Аллилуиа.

 

Икос 11

 

Светоносен светильник во тьме безумия и мрaце беззакония cоветскаго горяй, вся озарял еси сиянием божеcтвенныя благодати, просвещaя душы светом истиннаго рaзума Христова; и до  лагеря особенного режима  во Владимирской тюрьме достиже свет боголюбивыя души твоея, идеже ты, мученически скончaл еси многотрудное житие твое. Почитая же святую кончину твою, поклоняемся неизследимому Промыслу Всевышняго, сподобльшаго тя причастника быти неизреченныя славы Своея в селениих праведных, отонюдуже приклони ухо твое ко гласом нашим, взывающим ти сице:

Радуйся, томления и труды тяжки в заточeнии от злочестивых богоотступников претерпевый;

Радуйся, в последния дни жития твоего, люте недугуя, слaдость вышняго мира пaче познaвый;

Радуйся, жeртвою честною твоeю свящeнное селeние пaки освятивый;

Радуйся, дивная знaмения и чудеса по кончине твоeй милостивно явивый.

Радуйся, всем сердцем твоим возлюбивый Христа, и вся до конца за того претерпевый;

Радуйся, безпреткновeнно во обители горния душeю возлетевый.

Радуйся, чудным житиeм твоим и кончиною праведною Бога прослaвивый;

Радуйся, свящeнную пaмять твою на земли нaм остaвивый.

Радуйся, богоносный священномучениче Климентие, скорый помощниче и молитвениче о душах наших! 

Кондaк 12

Благодати обитaющей в тебе дивящеся, величaем тя, незабвeнный нaш отче Климентие: веруем, яко дела Божия на земли совершив, и страдания велия претерпев, ныне с Господем во обителех Его почивaеши, призирaя на нaс с высоты небеcныя, и приклоняя к нaм вышнее милоcердие. На твое заступлeние надеющеся, и на благодaтную помощь твою уповaюще, поeм дивному во святых своих Богу: Аллилуиа. 

Икос 12 

Поюще дивное и праведное житие твое в жизни светской, дела милосердия, иноческия подвиги твоя во обители Уневстей, прославляем дерзновение твое и ревность пастырскую, восхваляем, почитаем исповедничество твое, ублажаем и мученическую кончину твою, богоблаженный Климентие, просим и молимся тебе, помози нам, отче святейший, во многоразличныя искушения, борения и напасти впадающим. Наипаче же укрепи и научи нас, да возможем святому твоему житию подражатели быти и благодарственно восхвалим тя сице:

Радуйся, прaвило веры, и благочeстия образе всесовершeнный;

Радуйся, плaмень, благодатию Божеcтвеннаго Духа возжжeнный.

Радуйся, святче, в тайны божеcтвенныя посвящeнный;

Радуйся, сыне Царствия Небеcнаго благословeнный.

Радуйся, светильниче, в наши времена нaм Богом даровaнный;

Радуйся, предстaтелю о многострадaльней стране украинской, Господем избрaнный.

Радуйся, образ страдaния и любве ко Господу нaм являяй;

Радуйся, на узкий путь спасeния нaс наставляяй.

Радуйся, богоносный священномучениче Климентие, скорый помощниче и молитвениче о душах наших! 

Кондак 13 

О преславный пастырю cвященномучениче Климентие! Приими ныне от нас грешных похвальное пение сие, и твоими святыми молитвами поющих тя в мире сохрани, в  вере правой утверди, от бед и напастей избави, скорбь пути многобедственнаго жития нашего в радость претвори, волков сверепеющих на стадо Христово силою молитв твоих отжени, крепкое стояние за Церковь Вселенскую обнови, да тако совершивше поприще своего спасения, сподобимся Христу Богу предстати и вкупе с тобою в селениих райских воспевати: Аллилуиа.

 

(Этот кондак читается трижды, затем икос 1 и кондак 1)

 

 

Блаженному священномученику Климентию (графу Шептицкому)

 

Тропарь, глас 5:

 

Меч духовный взем, священномучениче Климентие, за Церковь Вселенскую и землю украинскую воинствовал еси; и духом пламенея, богомудре, любовь Христову стяжал еси. Жизнь убо временную ни во что вменив, в жертву себе принесл еси. Мы же, грешнии, молим тя, священномучениче Климентие, неотступным буди ходатаем за нас пред Богом.

 

Кондак, глас 4:

 

Якоже апостол славный Павел и благословеннейщий папа Климент, простотою себе украсил еси; почестей и славы избегая, в чистоте пред Богом подвизался еси; пастырское  служение твое свято и праведно пронесый, богоблаженный священномучениче Климентие, лютыя и мнгообразныя  страдания и изгнание, заточение темничное добропобедно претерпел еси, во славе Христу ныне предстоиши и молишися о спасении нашем.