Акафист о Непорочном Зачатии Девы Матере

 

Кондак 1

 

Избранной от всех родов, и прежде век уставленной в Матерь Богу, кроме греха сущей, и в Зачатии своем ада победившей, торжественныя песни восписую ти, недостойный раб твой Богородице, да мя свободиши от зол поющаго ти: Радуйся, в Зачатии твоем греху неповинная.

 

Икос 1

 

Ангел Гавриил со небесе послан бысть, благовестити Анне Тебе Дево плод благословенный: душевную бо твою Бог предувидев доброту, от прародителныя клятвы неврежденну тя соблюде, предваряя благодатию грех в тебе несоизволившей праматере Евы преслушанию, яко быти всегда тебе душею и телом святых святейшой, и от всех воспетой сице:

Радуйся, премудрости Божия главизно:

Радуйся, праведных родителей плоде благословенный.

Радуйся, рода нашего чаяние: радуйся, клятвы потребление.

Радуйся, ада пленение: радуйся, смерти умерщвление.

Радуйся, еюже Адам призвася: радуйся, еюже Ева свободися.

Р адуйся, в Зачатии твоем греху неповинная.

 

Кондак 2

 

Видевше купину иногда огнем неврежденну, твоего Зачатия чин познаваем. Аще бо и от чресл Иоакима, и от чрева Анны огню всенароднаго греха подлежащих произведе тя Творец, обаче не прикоснуся ти, ни вреди тя огнь родителный: темже сотворшему ти величие, поем Богу: Аллилуиа.

 

Икос 2

 

Разум всяк низумеет изявити, како возмогла бы еси послужити неизследимой Вочеловечения Божия тайне, и быти Мати Слову могущему избрати в Матерь себе, всех жен честнейшую, аще бы когда греху порабощенна была еси. Темже убо сведый тя быти истинно Богородицу, исповедую весма безгрешну, и глаголю:

Радуйся, Бога Слова Мати избранная: радуйся, всех жен честнейшая.

Радуйся, огнем всенародным неврежденная купино: радуйся, Вочеловечению Божию послужившая.

Радуйся, еюже мы ожихом: радуйся, еюже долг Прародителей воздадеся.

Радуйся, еюже едем отверзеся: радуйся, еюже благословение получихом.

Р адуйся, в Зачатии твоем греху неповинная.

 

Кондак 3

 

Сила Вышняго ороси Руно Гедеоново, егда вся земля сушею одержима бе, да сим Зачатия твоего Марие изследуем тайну: идеже бо вси прочии от чресл Адама прошедшии, в гресех зачинающееся, сухи и наги благодати Божия обретаются, тамо ты Отроковице одеянна силою с выше, благодати исполнилася еси: Темже сотворшему с тобою милость, поем Богу: Аллилуиа.

 

Икос 3

 

Имеяше Дева преблагословенна тою души и тела чистотою блистати, еяже вящшая под Богом разуметися не может: толико бо нечто есть чистее, елико ближае к свету приступает. Тыже паче всея твари, паче всех святых, и паче всех небесных духов в первой благодати сотворенных, приближилася еси величайшему свету, и чистоте безконечной Богу Слову плоть от тебе заимствовавшу. Убо чистота души твоея толика есть, яко превосходити ей святыню Ангел весма безгрешных, и прежде Зачатия, и в непорочном Зачатии достойной быти похвал сицевых:

Радуйся, неприступнаго света селение: радуйся, святынею всех превозшедшая.

Радуйся, одеянна силою свыше: радуйся, зерцало неимущее порока.

Радуйся, огненосная колеснице Слова: радуйся, Руно в Зачатии благодатию орошенное.

Радуйся, источниче невозмущенный: радуйся, еюже сухи, и жаждны прохладихомся.

Р адуйся, в Зачатии твоем греху неповинная.

 

Кондак 4

 

Буря и зелное наводнение всяк плод, и всю плоть истреби от земли, Ноев же ковчег избыток человеческаго рода обносящ посреде вод влаяся, цел от истления явися Богом сохранен, да твоего непорочнаго Зачатия имеем образ. Аще бо и всяко сеяние праотца Адама разверзая утробу, всенароднаго греховнаго не избеже потопа, еже бы не приразитися водам беззакония, и коснутися храмине душ человеческих. Тебе обаче святыни ковчег понесший Христа, нетленну и неврежденну в чреве Анны, имиже весть судбами, соблюде Бог, егоже благодаря пою песнь: Аллилуиа.

 

Икос 4

 

Слышав тя, Мати безмужная, в рождении Сына избывшую Евиных чадородия болезней, яже суть дерзнутаго вкушения казнь, не погрешу, егда тя в Зачатии твоем вознепщую быти Духа Святаго благодатию сохраненну от вины. Казнь бо последует вине, и вина предшествует казни. Несогрешившую убо тя в Еве, почитаю в Зачатии нескверном песнми:

Радуйся, одушевленный и Богом соблюденный ковчеже: радуйся, истления греховнаго избывший кивоте.

Радуйся, болезней Евиных избавление: радуйся, праматере несоизволившая преслушанию.

Радуйся, еюже всенародный преста потоп: радуйся. Еюже небурное имамы пристанище.

Радуйся, дуго облачная, еюже наводнения ктому не боимся: радуйся, еюже останок сынов Адамовых соблюдеся.

Р адуйся, в Зачатии твоем греху неповинная.

 

Кондак 5

 

Боготечной звезде утро возсиявшей не возможе одолети иногда бравыйся с Иаковом муж, но еже пущенну быти моляшеся, прообразуя твое Дево странное Зачатие. Токмо бо возсияла еси Звездо от Иакова, абие в самой заре Зачатия твоего изнеможе бравыйся с естеством нашим древный змий, и еже попранной быти главе его женскими ногами, смущашеся. Но не избеже пяты твоея, Богу коснувшутися, емуже пою песнь: Аллилуиа.

 

Икос 5

 

Видев Бог приближшееся время обновлению рода нашего, новую тя показа Еву, первейшею лепотою украшенну. Подобаше бо, да яко в Христе весма безгрешном мужеский пол честь получи, тако в тебе женское естество славу восприимет, ни единымже грехом врежденной. Ниже паки достояше, да бы праматере Евы в создании своем душа честнейшею нарещися имела, паче твоея, Богомати, в Зачатии твоем, еже Бог в наше соверши восстание, и клятвы разрушение. Возставлен убо тобою приношу ти в благодарение песнь сию:

Радуйся, Звездо, в самом утре Зачатия сияющая благодатию: радуйся, борителя адскаго победившая.

Радуйся, женское естество обновившая: радуйся, поползновение родителное исправившая.

Радуйся, еюже древний змий запятся: радуйся, ейже благодать дана есть изобилна.

Радуйся, еяже Зачатие свято Богови наречеся: радуйся, еюже вси от падежа востахом.

Р адуйся, в Зачатии твоем греху неповинная.

 

Кондак 6

 

Проповедует весь мир Иудифину крепость, и чистоту, яже Богом соблюдаема не токмо от полка Ассирийска нетленна изыде, но и знамение победы, главу гордаго властелина изнесе, еже бысть, да о твоем Дево чистом Зачатии уверимся. Тебе бо и в Зачатии твоем неврежденну грехом, от чресл Иоакима изшедшую сохрани Бог, и на мысленнаго Олоферна диавола укрепи тя, емуже всю власть, аки главу отсекши, свободила еси род наш от работы вражия, и наставила еси пети Богу песнь: Аллилуиа.

 

Икос 6

 

Возсиявшей ти от Анны, изнеможе язык достойно похвалити тя едину в женах чистую, и благословенную: о тебе бо возгласи Соломон: яко аще и многы дщеры стяжаша богатство и многы сотвориша силная, обаче ты предуспевающи превознеслася еси над всеми: ни едина бо возможе в первом бытия своего движении одолети аду, кроме тебе жены крепкия, юже сам Творец обрете, давый ти в користи место, всех дщерей Адамовых богатство изобилующее, яко имети тебе и Евину в Зачатии первую благодать, и силных жен мужество, и плодовитое Девство, по Успении же с телом и душею нетленную жизнь несоравненыя ради твоея святыни, юже ублажая пою:

Радуйся, от чресл Иоакима без вины зачатая: радуйся, адскаго Олоферна в чреве Аннином обезглавившая.

Радуйся, цвете тернием греховным неугнетенный: радуйся, в младейших ногтех Жено крепкая.

Радуйся, яже вся дщеры лепотою превозшла еси: радуйся, ейже дивная сотвори Бог.

Радуйся, светилниче присно благодатию светящий: радуйся, еюже в первую учинихомся честь.

Р адуйся, в Зачатии твоем греху неповинная.

 

Кондак 7

 

Хотя Бог сокровенную души и тела твоего показати святыню, назнамена ю иногда вратами, рекий Пророку: врата сия затворена будут, и не отверзутся, и никтоже пройдет сквозе их, яко Господь Бог Израилев пройдет ими. Подобаше бо, да яко в теле твоем ключи Девства не вреди в Рождестве своем Бог, тако и твоея души найпаче в Зачатии твоем врата затворена блюдет, еже бы прародителному греху не пройти сквозе их: понеже Он грех Адама понесый, имеяше сам пройти ими, и вселитися с благодатию в души твоей, емуже пою песнь: Аллилуиа.

 

Икос 7

 

Новый гроб, и ни единым же мертвецем осквернен в тридневное телу своему упокоение восхотевый имети Сын твой, и Бог наш, никакоже попустил бы ветхому мертвителну Адамову тлению повредити тя: в нейже, яко в новейшом, и всякою благодатию украшенном чертозе, девять месяцей таяся поживе: и яко от гроба печати не разруш изыде, тако из боку твоею плоть нося явися, да вси в Зачатии твоем радующеся, и еже тебе радоватися сердцем и усты воспоем:

Радуйся, двере непроходимая греху: радуйся, чертоже слова заключенный.

Радуйся, престоле Богу всегда посвященный: радуйся, Раю древом насажденный живота.

Радуйся, яко в Зачатии, греха, тако во рождении Сына, болезней избывшая: радуйся, сосуде в честь сотворенный.

Радуйся, столпе Давидов, адом непоколебленный: радуйся, земле всегда благословенная.

Р адуйся, в Зачатии твоем греху неповинная.

 

Кондак 8

 

Странно бе Вочеловечение Бога, странное и твое Богомати непщуется быти Зачатие. Аще бо бы общее имела еси с рожденными в гресех бытие твое, убо греха повинна сущи, не возмогла бы еси нарещися Мати безгрешнаго: каковое бо древо, таков и плод износити обыче, и аще родителе безчестны суть, безчестие их чад касается. Но Сына твоего никтоже обличи о гресе, убо и тебе равне безгрешну восхоте имети Матерь, емуже яко Богу, пою песнь: Аллилуиа.

 

Икос 8

 

Всю добру, всю красну, и непорочну воспел тя есть духом движимый Соломон, да и нас привлечет к похвалению непорочнаго Зачатия твоего, в немже ничтоже скверненно пострадала еси. Аще бо в первой малейшей жития твоего черте осквернилабыся еси калом греха прародителнаго, никакоже всю непорочну нарекл бы тя Дух Святый. И малейшаго бо ради вреда соделовается вещь весма недобра и порочна: добру убо всю и непорочну в Зачатии твоем быти тя уразумевше, восписуем ти похвалная:

Радуйся, безгрешнаго Сына, безгрешная Мати: радуйся, вся добра, и вся красна ближняя Духа Святаго.

Радуйся, непорочная, Агнице упасшая Агнца Христа: радуйся, голубице чистая, желчи греха неимущая.

Радуйся, аки солнце избранная, при востоце света нелишенная: радуйся, луно красная, всегда в полноте благодатию сияющая.

Радуйся, от суха корене Иессеова жезле процветший: радуйся, Адамово и Евино паки воззвание.

Р адуйся, в Зачатии твоем греху неповинная.

 

Кондак 9

 

Все естество, и всяк чин сорадуется тебе в Зачатии твоем Царице, в немже тя Царь славы паче Есфиры сияющую лепотою души, возлюби. Токмо бо вошла еси в преддверие бытия, идеже вси общему смерти и греха за преслушание подлежат уставу, абие простреся ти жезл благодати, и еже не боятися тебе единой общия казни, дано есть, да увемы побеждатися естества уставом о тебе Дево чистая, и пети Богу тако изволившему песнь: Аллилуиа.

 

Икос 9

 

Ветийства и гадания зле мудрствующих о Зачатии твоем яко паучина разтерзашася, а еже веровати, Зачатие твое безгрешно быти, богоприятно есть: могий бо тя Девою соблюсти в чадородии, можаше и сие сотворити Бог, еже бы в Зачатии твоем не навести лишения первенствующия благодати. И да бы тако сотворил, всячески прилично бе, чести ради Матерны: убо и сотвори державу мышцею своею, расточи же гордыя мыслию сердца умствующых общему греху Зачатие твое быти повинно. Их же разума бегая, пою ти от души:

Радуйся, Царице, благодать обретшая у Бога: радуйся, Есфире, общему пагубы не подлежащая уставу.

Радуйся, от всенародныя казни, лишения благодати соблюденная едина: радуйся, на тебе промысла и могутства Божия известное исполнение.

Радуйся, неоранная ниво, и невозделанная прозябнути имевшая Христа: радуйся, чистоты сладковонный цвете.

Радуйся, невещественный угле, имже сожжеся Адамово рукописание: радуйся, почитающым твое Зачатие благих ходатаице.

Р адуйся, в Зачатии твоем греху неповинная.

 

Кондак 10

 

Спасти хотя род человеческий гладом тающь, егда заключи Илия небо, изведе Бог от моря облак мал и легок, аки след ноги человеческия, имже вся оросися земля, прознаменуя Девы от Анны безгрешное Зачатие: яко бо море горко, и тяжко сущи, разнствующ от себе в легкости и сладости изнесе плод, тако Иоаким и Анна в гресе родившееся произведоста тебе Дево, легкий облак разнствующ от них благодатию, юже в малейшем телеси, и в самом следе человечества абие получила еси, и сподобилася одождити нам Христа, емуже пою песнь: Аллилуиа.

 

Икос 10

 

Стены и основание вышняго Иерусалима, идеже неприступный обытает свет, от камене чиста, и дражайша украсивый Бог, егда изволи снити на землю, устрои себе светлейшую палату всяким добродетелей родом украшенну, начен от основания лепоту ея. Палата же и град в пребывание самому Богу, ты несверная Дево была еси, к нейже ни приступити, ни подкопатися возможе древный тать, окрадый в Раи лепоту естества нашего. Ибо не токмо стены совершеннаго возраста твоего светящияся, аки адамант неподвижныя на зло быша, но и преддверие бытия, и основание духа животнаго в младейших ногтех плоти твоея чисто, свято, и утвержденно благодатию состояшеся. Темже почитая тя Госпоже, пою ты от любве:

Радуйся, облаче легкий, сладости исполненный: радуйся, от чрева Анны, аки от моря уканутая чистая росо.

Радуйся, ейже никогдаже заключися небо: радуйся, от основания святый граде Божий.

Радуйся, храмино, ветхим татем неподкопанна: радуйся, стено неподвижимая на зло.

Радуйся, златый одре Соломонов, окружаемый силными: радуйся, сокровище благих тмами Ангел хранимое.

Р адуйся, в Зачатии твоем греху неповинная.

 

Кондак 11

 

Пение аще и не по достоянию приношу ти Госпоже, обаче веру приими, ибо веси любовь мою яже к тебе всеусердну. Ниже бо по достоянию Зачатие твое похвалити ми возможно есть. Понеже вся слава твоя Дщи Царя небеснаго, внутрь есть рясны златыми одеяна, и преукрашена. Веровати убо ми от любве подобает, яко внутрь Анны имела еси славу, и одеяние благодати честнейшее паче злата чиста. А еже внутрь даров Духа Святаго на душу твою излиянных, внити умом, Бога создавшаго тя дело есть, емуже пою: Аллилуиа.

 

Икос 11

 

Светоприемное бе Зачатия твоего время Богом избранная Отроковице, неподстоящее числу дней и нощей проклятых Иовом, в няже зачинается всяк человек. Ибо созда тя Господь в начаток путей своих, в дела его, прежде век основа тя. Прежде сотворения земли и прежде всех холм Зачатие твое. Егда готовяше небо, егда крепки творяше облаки, с ним была еси. Из уст же своих Вышный изведе тя перворожденну всея твари, и тобою сотвори, на небе, да сияет свет присно. Аще убо прежде век уставленно есть бытие твое, и тобою седящим в тме свет возсия нам, воистинну предварила еси преслушание праотца Адама под временем бывшее, и ни един же час нощи греховныя обыде тя, вселшуся в душу твою свету благодати Божия, юже в тебе ублажаю, воспевая ти:

Радуйся, Дщи Царя великаго, внутрь Анны славу получившая: радуйся, одеждою первыя благодати украшенная.

Радуйся, дары Духа Святаго аки рясны златыми упещренна: радуйся, дню, емуже благослови Бог.

Радуйся, от неяже тма греховная прогнася: радуйся, ейже зело рано свет милости Божия облиста.

Радуйся, прежде век от уст Вышняго изведенная: радуйся, времени преступления Адамова неподлежавшая.

Р адуйся, в Зачатии твоем греху неповинная.

 

Кондак 12

 

Благодать данную ти Девице, при Зачатии твоем хотя назнаменовати Бог, яви ю в сучце масличном, егоже Ною принесе голубица в знамение престатия потопа. Якоже бо сучец от согнивших древес изыде зеленящся, и неврежден водами, тако и ты от неплодных Иоакима и Анны, неврежденна грехом, и цветущая благодатию Духа Святаго, в виде голубинном миру явленнаго, изведеся в знамение престатия казни Божия, юже наведе на ны праведно. Сподоблены убо тобою милости Божия, поем Богу: Аллилуиа.

 

Икос 12

 

Поюще твоя Богомати похвалы, торжествуем светло твое от праведных Родителей Зачатие, еже аще бы не было свято, и безгрешно, не бы день его почитала святая Церковь, и песнми, и пении святила народно. Но понеже сие со усердием творит, убо и мы ублажим по силе святое Богоматере Зачатие, и возопим радостно к ней:

Радуйся, сучче масличный, беззакония водами неврежденный: радуйся, леторосле, от древес неизбывших потопа отрожденная.

Радуйся, в знамение благодати Божия данная: радуйся, древу уведения злаго неприближившаяся.

Радуйся, мироположнице истачающая сладковонное миро первенствующия благодати: радуйся, горо тучная и несекомая весма.

Радуйся, святынею Зачатия твоего Ангелов безгрешию соравнившаяся: радуйся, от всего круга земнаго почтенная.

Р адуйся, в Зачатии твоем греху неповинная.

 

Кондак 13

 

О всепетая Мати, обрадованная Марие, всякия благодати исполненная Госпоже моя: приими малое сие к почтению непорочнаго Зачатия твоего мною грешным принесенное тебе моление. И внегда изчезати от мене духу моему, помяни мя, и уготованнаго ради грехов моих, избави мучения. Аз же пети буду тебе, и Сыну твоему всегда песнь: Аллилуиа.

 

И прилагается Икос 1 и Кондак 1.

Молитва

Госпоже моя преблагословенная, Мати Бога и Дево нетленная, примирительнице рода нашего, и всея твари Царице, Херувимов честнейшая, и Серафимов славнейшая. Тебе Бог в Зачатии, и в утробе Анны благодатию освяти. В младенчестве в службу избра. В совершении возраста Девою соблюд, Матернством своим возвеличи. И тако всем видом естественных и вышше естественных даров исполни, яко бытии тебе по Христе, от множества Ангел и человек единой, на нюже вся сокровища своя богатый в милости истощи, и всемогущий могутство свое определи, еже бы в сотворенных вещех ни умом постигнути честнейшаго дела рук его паче тебе. Не токмо же за живота, но и по успении твоем почте тя паче всех, егда с душею и телом на нетленную жизнь престави, и посади тя на престоле славы своея, вручив вся земных твоему промышлению нужды. К тебе с верою припадаю, в тебе надежду имам, и от всего сердца люблю тя, и радуюся о всех благодеяниих Божиих на тебе излиянных, такожде веселюся о твоем прежде век, и от всего рода избрании в Матерь Богу: яко аще бы судбами Божиими честь сия мне уготована была, не возжадалбым ея себе, но твоей святыни дати усердствовалбых, да бы ты получила ю. Вем бо Госпоже, никомуже приличнейшее бытии сие достоинство, паче тебе, яже вся силы иждивила еси в употребление Богоприятное даров тебе данных. К семуже должен есмь тебе любовь сию, и усердие, за великая твоя мне сотворенная благодеяния. Тобою бо милость Божию получих. Тобою от падежа греховнаго востах. Ты ми исходатайствовала еси естественныя и паче естественныя дары. Ты мя от врат смертных, и болезней к животу привела еси. Твоею помощею избегох различных сетей, твоим промышлением, яже имам, получих благая, за вся же сия приношу ти малое сие благодарение. Надеюся бо на твою милость, яко непрезриши малейшаго дарования. Ибо благих моих не требуеши богата сущи, и яко вся моя твоя суть. Прийми убо Госпоже дань и любовь мою, и недаждь ми погибнути в веки. Несть бо от века слышано, да бы кто твоей вручен помощи, лишился надежды своея. Ей испоручнице моя! Мати любезнейшая, прибежище мое, сотвори со мною милость, иже от усердия святое Зачатие твое воспеваю, и призываю сладчайшее имя: Мария, аминь.

 

Вручение самого себе Деве Марии

Святая Марие Мати Бога, и Дево. Аз (имярек) тя ныне в Госпожу, ходатаицу и покровителнецу мою избираю себе. Крепко же прирекаю и постановляю никогдаже тебе отрещися, ниже что противу тебе изрещи, ни сотворити, ни подначалным моим попущу когда, да бы нечто противно чести твоей сотворили. Молю убо тя, прийми мя за раба себе вечнаго. Помогай ми во всех делех моих, и не остави мене в час смерти моея. Аминь.

Б уди благословенно святое и непорочное Зачатие преблагословенныя Девы Марии.